Berrikuntza proiektuak

Industria 4.0 esparruan, funtsezkoa ikusten da ekoizpen- eta neurtze-makinen arteko komunikazio adimenduna garatzea, eta horixe izango da proiektu honen helburua: tornu-makina eta laser-neurgailu baten arteko komunikazio garatzea.

Makinak eta neurgailuak zelula autonomo bat osatuko dute. Tornua mekanizatzen ari den pieza laser bidez neurtuko da, eta detektatutako neurketak tornura bidaliko dira unean uneko akatsak konpentsatzeko.

Proiektu honek kontzeptu bi uztartzen ditu, batetik biki digitala eta bestetik murgiltze gela interaktiboa. Helburua biki digitala murgiltze gela interaktiboetan ezartzea da.

Biki Digitalaren teknologiak bultzada handia izan du dituen abantaila hauengatik:

• Benetako inbertsio baten aurretiko froga erreala egiteko aukera eskaintzen du.
• Instalazioetako berariazko probak egin ahal daitezke.
• Funtzionamendua gainbegiratu daiteke
• Disfuntzioak aurreikustea eta zergatiak aztertzea ahalbideratzen du.
• Instalazioarekin elkarreragiteko aukera ematen du
• Formaziorako aukera eskaintzen du

Makina edo instalazio baten atal mekanikoak simulatzeko SIEMENS NX eta MCD (Mechatronic Concept Design)  softwareak erabiliko dira, automatizatzeko Tia Portal programa eta biak uztartzeko PLCSIM advanced softwarea.

Ingurune birtualetan ahalik eta modu errealenean murgiltzeko DIGALIX etxeko hiru pantaila interaktibo erabiliko dira eta esperientzia areagotzeko SIEMENS NX design VR softwarea.

Proiektu honek  Mekatronika Industriala eta Automatizazio eta Robotika Industriala zikloetako ikasleei Biki Digitalari buruzko gaia lantzeko aukera emango die, beraien esperientzia eta curriculuma aberastuz.

4.0 Industria, industria-ekonomiaren korronte nagusi bihurtu da. Termino hori 2010eko hamarkadaren hasieran sortu zen Alemanian, industriaren eraldaketa digitalaren prozesuari izena emateko, eta gaur egun oso presente dago industria osatzen dute azpisektore guztietan.

Armeria Eskolan industria 4.0-rekin lotutako teknologiak garatzeko zelula integratu bat instalatu dugu, ekoizpen prozesuak simulatzen dituena. Zelula integratua erabiliz, ikasketa-jarduerak garatu eta ondorengo teknologiak hauek landuko dira: Bisio artifizialeko kamerak, RFID identifikatzaile eta irakurleak, IO-Link sentsore adimendunak, MES ekoizpen kudeaketa sistema, komunikazio industrialak, HMI pantailak… 

Proiektu honen bidez, ikasleak inguru industrial aurreratuetan lan egiteko prestatuko dira, eraldaketa digitalak dakartzan erronkei aurre eginez.

Sentsore adimendunek informazioa sortzen den tokian bildu eta prozesatzen dute eta automatizazioaren “begi eta belarri” lanak egiten dituzte. IO-Link sistemari esker, sentsoreak eta eragingailuak prozesuen parte aktiboa bihurtu dira. Igorle gisa, modu autonomoan jakinarazten dituzte akatsak eta kontrol-egoerak. Hartzaile gisa, itzulera-seinaleak jasotzen dituzte eta prozesatu egiten dituzte. Horren emaitza kostuak balio-kate osoan optimizatzea da.

Bestalde, zibersegurtasuna lehentasun bihurtu da enpresentzat. Eraso zibernetikoek ugaritu egin dira azken aldian eta enpresak profil espezializatuak txertatzen ari dira, erasoak detektatu, prebenitu, gainbegiratu eta zuzentzeko.

Proiektu honen bidez, gailu adimendunak eta lankidetzakoak diseinatu eta fabrikatuko dira, benetako lan-ingurune batean gizakiekin elkarreragin fisikoa izateko.

Gailu horiek informazioa modu seguruan trukatuko dute 4.0 industriako teknologia disruptiboen bidez, hala nola gauzen Interneta, zibersegurtasuna eta cloud soluzioak. Gainera, gailuaren zenbait zati 3D teknologiarekin fabrikatuko dira.

Gailu horren garapena, diseinua, kontrola eta inplementazioa Siemens teknologiaren bidez egingo da, landuko diren atalak hauek izango direlarik: ardatz elektrikoen mugimenduak kudeatzea eta kontrolatzea, gailuaren funtzionamendua kontrol pantailetan bistaratzea, pertsonen segurtasuna bermatzea, maila guztietan komunikatzea eta modu erreal eta eraginkorrean instalazioa abian jartzea.

Roboten erabilera oso zabalduta dago industrian eta lanbide heziketako ikasleak roboten erabileran formatu beharra dago. Hala ere, robotak duten prezioagatik, ez da erreza ikastetxe batean robot ugari eta fabrikante desberdinetakoak eskuragarri izatea.

Proiektu honen helburua, edozein ingurunetan erabiltzeko robot birtualak sortzea da. Hori lortzeko, roboten simulazioa eta errealitate birtuala eta errealitate areagotua uztartuko ditu proiektuak. Honela, ikasleek robotekin praktikak egiten ahal izango dute modu birtual batean, robot fisiko baten beharra izan gabe.

Sistema honek erraztasun eta malgutasun handiak ematen ditu, alde batetik robot fisikoen beharra kentzen duelako eta bestalde hainbat motatako robotak eta inguruneak erabiltzea ahalbidetzen duelako.

Nodo honen helburua LHko ikastetxeak fabrikazio aurreratuaren esparruko azken joeretan parte hartzera bultzatzea da, ezagutzak euskal enpresa-sarearen egungo eta etorkizuneko beharretara egokitzeko. Horretarako, nodo honek LHko ikastetxeei ezagutarazten zaien lehentasun-mapa bat sortzeko behar den zaintza teknologikoa egiten du. Azterlan hori da proiektu posibleak identifikatzeko eta proiektu berriak abian jartzea sustatzeko oinarria. Proiektu posibleez gain, nodo horiek ikastetxeen arteko sinergiak eta lankidetzak sor daitezkeen espazioak dira.

Fabrikazio aurreratuko nodoa Euskadiko LHko Berrikuntzako Euskal Sistemaren barruan abian dagoen sare-nodoetako bat da. Sare-nodo horien bidez berrikuntza-estrategia aztertu eta LHko ikastetxeen sarera zabaltzen da. Horrela, Euskadiko Lanbide Heziketa Euskadiko Espezializazio Adimenduneko RIS3 estrategiaren eremu estrategikoekin lerrokatzen da.

Nodo honen helburua LHko ikastetxeak fabrika digital eta konektatuaren esparruko azken joeretan parte hartzera bultzatzea da, ezagutzak euskal enpresa-sarearen egungo eta etorkizuneko beharretara egokitzeko. Horretarako, nodo honek LHko ikastetxeei ezagutarazten zaien lehentasun-mapa bat sortzeko behar den zaintza teknologikoa egiten du. Azterlan hori da proiektu posibleak identifikatzeko eta proiektu berriak abian jartzea sustatzeko oinarria. Proiektu posibleez gain, nodo horiek ikastetxeen arteko sinergiak eta lankidetzak sor daitezkeen espazioak dira.

Fabrika digital eta konektatuaren nodoa Euskadiko LHko Berrikuntzaren Euskal Sistemaren barruan abian dagoen sare-nodoetako bat da. Sare-nodo horien bidez berrikuntza-estrategia aztertu eta LHko ikastetxeen sarera zabaltzen da. Horrela, Euskadiko Lanbide Heziketa Euskadiko Espezializazio Adimenduneko RIS3 estrategiaren eremu estrategikoekin lerrokatzen da.

EMEU Programak gero eta globalagoa den lan-merkatu batean nazioarteko esperientzia hartzeko aukerak eskaintzen dizkie ikasle eta irakasleei. Programa honek mugikortasun birtualak (LHko ikastetxeen arteko lankidetza Internet bidez) zein errealak (2-3 asteko ikaskuntza-moduluak Emeu sareko zentro batean) jasotzen ditu.

Hezkuntzak eta gure ikastetxeak aurrera egin dezaten, ezinbestekoa da berrikuntza arlo guztietara hedatzea, bai esparru teknologikora zein besteetara, eta horretarako zaintza edo bigilantzia sistematika bat ezarri behar da. Ideia-Zorroa zaintza horren testuinguruan kokatzen da.

Sistematika horren lehen pausoa Armeria Eskolako langile guztien berrikuntza, hobekuntza edo aldaketa ideiak biltzea da, horretarako formulario bat betetzen delarik. Formularioa Berrikuntza Zuzendariak jasotzen du eta ideia bidali duen pertsonarekin kontaktuan jartzen da argibideak eskatu eta ideia garatzeko. Garatutako ideiak IDEIEN TXOKOAN gorde eta prozesuen jabeekin aztertzen dira, ardatz estrategikoekin lerrokatuta al dauden eta gaian aditurik ba al dugun baloratuz. Azkenik, aukeratuak izan diren ideiak aurreproiektuen portafolioan sartuko dira eta Estrategia Foroak erabakiko du ideia horiek ikastetxeko estrategian eta urteko planetan nola txertatu.

Duela 20 urte, Armeria Eskola aitzindaria izan zen 2,5kWp-tako instalazio fotovoltaikoa jartzean, eta urte batzuk geroxeago, bigarren instalazio bat egin zuen EVEren laguntzarekin.

2019. urteko lege aldaketak bultzatuta, autokontsumorako instalazio bat egitea erabaki eta 85 plaka berri jarri ditugu frontoi gaineko solariruan. hirugarren instalazio hau 38,68kWp potentziakoa da eta gure eraikinak urtean kontsumitzen duen argindarraren %23,5 ekoiztuko du. Konpentsaziodun autokontsumokoa da, hau da, sortzen duen energia kontsumitzen dena baino gehiago denean soberakina sarera sartzen da. Aldiz, kontsumoa handiagoa denean, fakturatik konpentsatzen da. Hasieran, inbertsioa 7 urtetan amortizatzea aurreikusten bazen ere, argindarrak gaur egun duen prezioarekin, litekeena da epea 4 urtetara murriztea. Instalazioak denbora errealean sortutako energia  lotura honetan ikus dezakezu-

48.539,4 euroko dirulaguntza izan dugu Europako NEXT Generation funtsetatik eta 29.002,5 eurokoa jasotzea espero dugu Euskal Energiaren Erakundetik.

Makina bat, eta modu zabalagoan prozesu bat, Industria 4.0ko makina adimenduna bihurtzeko jarraitu beharreko prozedura guztia aztertu eta zehaztuko da proiektu honetan, gida bat osatuz. Horretarako, makina zehatz bat birtualizatuko da, prensa bat, gero gida beste edozein makina / prozesura orokortuz.

Teknologiaz haratago, sortuko den gida honetan, makina edo prozesu bat digitalizatzeak dituen beste inplikazioak ere aztertuko dira: eskatzen duen prestakuntzan, enpresaren egituran, departamentuen arteko lan kolaboratiboan, egiteko moduen eguneraketan, etab.

Makina adimendua lortzeko prozesu hau benetako makina batekin landuko da, eta funtzionala izango den makina birtual bat lortzea da helburua, teknologia hauek landuz: BIKI DIGITALA, ZIBERSEGURTASUNA, PROTOKOLO IREKIKO KOMUNIKAZIOA, EDGE¬CLOUD COMPUTING eta ERP.

Aulki autonomoa, eskola ondoan dagoen ASPACE erakundean, gurpildun aulkiak erabiltzen dituzten umeei zuzendutako proiektua da. Proiektu honetan, ume hauek modu autonomoan mugitzeko plataforma bat garatuko da, Diseinua Fabrikazio Mekanikoan eta Elektronika departamentuen artean.

Plataforma edozein erroberadun aulkitara atxikitzeko diseinatuko da, bertan dituzten edozein aulkirekin erabili ahal izateko. Plataformak mikrokontrolagailu bat izango du eta funtzionatzeko era desberdina izateko programatuko da: ibilbide automatikoa, joystick bidez gidatua etab.

Proiektua, elektronika lehen mailako ikasleekin erronka bat gauzatzeko ere erabiliko da.

Fabrikazio gehigarriko teknologian eskala handiago batetara jauzi egitea da helburua, bide horretan emaitza arrakastatsuak lortzen ari diren atzerriko esperientzien estrategia jarraituz. Esperientzia guzti hauetan plastikozko grantza da lehengaia eta robot batek du materiala inprimaketa gunean modu egokian kokatzeko ardura.

Proiektu honen bidez, teknologia horrekin esperimentatu nahi da, eskaintzen dituen garapen-aukerak aztertzeko eta, aldi berean, proiektuan parte hartzen duten irakasleek ikasgelara transferituko diren gaitasunak eta ezagutzak eskuratuko ditu. Horrela, horrek guztiak gure ikasleei eta jasotzen duten prestakuntzari mesede egingo die.

Metrologiaren joerak jarraituz, berrikuntza arlo honek Makina Erremintan bertan egindako neurketa aztertu eta ikertzen ditu, “Zero akatsetara” hurbiltzeko helburuarekin, piezarik askatu gabe.

Gaur egungo industria 4.0 ingurune baten metrologia gero eta gehiago prozesuan txertatzen ari da. Prozesu baten kalitatea bermatzeko etapa guztiak modu integratuan izateak badu teknologikoki zailtasunak eta proiektu honen bidez integrazio horren ezarpena aztertzen ari gara.

Bestalde, integrazio honek onura garbiak izango ditu produkzio linea baterako, besteak beste, eraginkortasuna, produktibitate hobekuntza eta prozesuko etapa ezberdinak modu automatikoan garatzea.

Armeria Eskolako Industria 4.0 lantaldearen helburua 4.0 industria-teknologien garapenak ikastetxearen prestakuntza-eskaintzan nola eta zer neurritan eragiten duen aztertzea da. Azterlan honen bidez, gure ingurunean gehien eskatzen diren profil profesionalen konpetentziak eta gaitasunak nola bilakatzen ari diren ikusi nahi dugu.

Lantalde horren analisia koordinatzen eta kontrastatzen da parte hartzen dugun sare-nodoetatik datorrenarekin, gure prestakuntza-eskaintza egokitzeko; edukietan, instalazioetan eta ekipamenduetan lan-merkatuaren premia berrietara eguneratuz.

Fabrikazio mekanikoko diseinuaren barruan, alderantzizko ingeniaritzak aukera ugari eskaintzen ditu. Armeria Eskolak doitasunezko eskanerrak ditu, eta, horiei esker, objektuaren dimentsioak modu zehatz eta eraginkorrean atzeman daitezke, eta, horrela, beharrezko informazioa ateratzen da itxuraren eta funtzionaltasunaren ezaugarri egokiak dituzten diseinu berriak sortzeko.

Lantalde honen helburua alderantzizko ingeniaritzako teknologiak Armeria Eskolari eskaintzen dion eskaintza garatzeko eta berritzeko aukerak aztertzea da, bai prestakuntzaren ikuspegitik, bai Tkguneren bidezko zerbitzuaren ikuspegitik.