Armeria Eskola Eibarko Lanbide Heziketako ikastetxe integratua eta publikoa da. Esparru industrialean kokatuak gaude eta erdi zein goi mailako zikloak, espezializazioak eta enplegurako prestakuntza eskaintzen ditugu.
Gure aktibitate eta izaeraren muina pertsonak kualifikatu eta enpresak lehiakorrak izan daitezen laguntzea da.
Armeria Eskolan gure izaera eibartarra aldarrikatu nahi dugu; izaera hori baita gure nortasun-zeinua. Planteamendu uniformizatzaileen aurrean, gure EIBAR markak eta gure “ondo egindako lana” leloak ezin hobeto laburtzen ditu zein den Armeria Eskolaren eginkizuna.
Ikastetxea ekosistema moduan ulertzen dugu, garatu nahi ditugun balioak: aniztasuna, bizitasuna, elkarlana, kolaborazioa, oztopoak gainditu eta aurrera egiteko grina… horretara egokitutako espazio, ekipamendu eta dinamikekin uztartu nahiko genituzkeelako. Gure jarduera eta izaera pertsonen kualifikazioan eta enpresak lehiakorragoak izan daitezen laguntzean oinarritzen dela jakinda, hori gauzatzeko eta gizarte dinamiko, kohesionatu eta moderno batean bizitzeko bidea aberastu nahi genuke.
Saririk garrantzitsuenak eskuratu ditugu (Alfonso X Jakitunaren Gorbata, Gipuzkoako Urrezko Domina, Lan Onari…). Harro gaude 100 urtetik gorako ibilbidean Eibar eta inguruko gizarteari eskaini diogun zerbitzuarekin, eta baita, gure ikasleek, errealitate ekonomiko eta sozialaren agente eraldatzaile gisa egin duten eta egiten diharduten lanarekin ere. Aipagarria da ikasle horiek 400 enpresatik gora sortu izana.
Gure zerbitzuak nazioarteko kalitate-estandarrekin eskaintzen ditugu, gure eskaintza anbizio handikoa da eta etengabe eguneratzen dugu. Kalitatezko Lanbide Heziketaren alde egiten dugu, konplexu eta estigmarik gabeko heziketaren alde, gure industria-ehunaren egiazko premietara egokitutakoa, zerbitzu publikorako dugun bokazioaren adierazle.
Ez gara esaten duguna, egiten duguna baizik.
Abiadura handian eraldatzen ari den gizarte honek etengabe egokitzea eskatzen digu eta erronka berriei erantzuteko gaitasuna izatea. Horretarako, oraingoak ez diren beste esparru batzuetara zabaldu eta hedatu beharko ditugu gure jarduerak. Aldi berean, iraultza industrial teknologikoan murgilduta egonik, ezinbestekoa da pertsonak modu integralean heztea, giza garapen jasangarriak landuz.
Testuinguru honetan, Armeria Eskolak teknikoki zein giza gaitasunetan ikasleak trebatu, enpresa sare lehiakorra bultzatu eta gizarte aurreratua garatzea ditu xede, eta horretarako gure egiten ditugu politika hauek:
- Gizarteari kalitatezko zerbitzua eskaintzeko konpromisoa.
- Euskararen erabilera eta hizkuntza-aniztasunarekiko errespetua bultzatzea.
- Ingurumena babestu eta Lan baldintza seguruak, osasuntsuak bermatzea.
- Parekidetasunaren alde lan egitea.
Oraingoak ez diren beste esparru batzuetara zabaldu eta hedatu beharko ditugu gure jarduerak.
KALITATEA
Gizarte dinamiko honen beharrak bermez asebetetzeko, Armeria Eskolarentzat ezinbestekoa da kalitate sistema eraginkorra izatea, etengabeko hobekuntzan oinarritu eta lege-eskakizunak beteko dituena. Horretarako, EFQM Europar Kudeaketa-eredua eta UNE-EN-ISO 9001 erreferentziazko kudeaketa eredutan oinarritzen dugu gure funtzionamendua.
INGURUMENA ETA SEGURTASUNA
Armeria Eskolak garapen iraunkorraren aldeko apustua egiten du. Konpromisoa hartzen du kutsadura eta energia-kontsumoa murrizteko, eta materialak zentzuz erabiltzeko, haien zenbatekoa murriztuz, berrerabiltzearen alde eginez eta birziklatzea ahalbidetuko duten neurriak hartuz. Hori guztia kideen parte hartzea bultzatuz, indarrean dagoen araudia betez eta etengabeko hobekuntza aplikatuz egingo da. Armeria Eskolak bermatu egingo du irakasleek zein ikasleek baldintza seguruetan eta osasuntsuetan lan egingo dutela. Aldi berean, osasunari eta elikadurari lotutako ohiturak sustatuko ditu. Garrantzi berezia ematen diogu ikasleak eta langileak gai hauekiko sentsibilizatzeari. Ingurumen-kudeaketa ISO14000 sistemaren bidez bermatuko da.
EUSKARA
Armeria Eskolak euskara erabiltzea lehenetsiko duen eredu eleaniztunaren alde egiten du. Ahal den neurrian, Armeria Eskolako langileen arteko komunikazioa euskaraz egingo da. Ikasleek ikastetxearekin zein hizkuntzatan komunikatu nahi duten aukeratu ahal izango dute, eta ikastetxeak erabaki hori errespetatuko du. Armeria Eskolak bere zerbitzu guztiak euskaraz eta gaztelaniaz eskainiko ditu, D eredua eta ingelesezko moduluak indartuz. Gure ikasleen gaitasun komunikatiboak hiru hizkuntzetan garatzeko konpromisoa hartzen dugu, Hezkuntza Sailak finkatutako helburuak lortu arte. Enpresekiko, administrazioekiko eta, oro har, gizartearekiko komunikazioa elebiduna izango da, horien guztien hizkuntza-aukera errespetatuz, gure aldetik euskararen erabilera lehenetsiz eta une oro euskararekiko dugun konpromisoa erakutsiz. Hizkuntza politika garatzeko tresnak Hizkuntza Proiektua eta Ulibarri programa izango dira.
PAREKIDETASUNAREN ALDE LAN EGITEA
Armeria Eskolak Lanbide Heziketa parekidearen alde lan egiteko konpromisoa hartzen du. Emakumeentzat ez da batere erraza izan industria-eremura iristea, gehienbat gizonez osatua egon delako eta rolek zein estereotipoek eragin handia izan dutelako. Baina Armeria Eskolak errealitate hori eraldatzeko apustua egiten du, eta genero-berdintasunaren alde lan egiteko konpromisoa hartzen du, urteko planetan parekidetasuna bultzatzeko ekintzak ezarriz, komunikabideetan emakumearen presentzia lehenetsiz eta bi sexuen arteko aukera-berdintasunaren aldeko programak sustatuz.
Armeria Eskola 1912 urtean sortu zen Udalaren ekimenez, Eibar eta inguruko industriaren garapena bultzatzeko asmoarekin. Sorreran garai hartako armen industriarekin lotura handia izan bazuen ere, denborarekin arlo ezberdinetara zabaldu zen: zehaztasun mekanikoa, elektrizitate-elektronika, diseinu eta kalitatearen gestioa,…
Hasieratik, inguruko lantegiekin harreman estua izan du eta teknologia berrien bultzatzaile izan da. Horri guztiari esker, 1981. urtean, Ikasle Ohien Elkartearen gidaritzari esker, “Tekniker Ikerketa Zentroa” sortu zen.
Garai hartan ezarritako bidea jarraituz, unean uneko gizartera egokituz eta gizarte horren garapena sustatuz, Armeria Eskola gaur egun ezagutzen duguna izatera heldu da, Lanbide Heziketako Ikastetxe Integratua, publikoa, eta hasierako zein enplegurako prestakuntzak eskaintzen dituena.
1912
Armeria Eskolaren sorrera
Armeria Eskola sortzea onartu zen Eibarko Udalean. Espezialitatea: armagintza. Liejako (Belgika) eta Saint Etienneko (Frantzia) eskoletatik hartutako ikasketa planak jarraitu ziren.
1913
Lehen harria jartzea
Lehen ikasturtearen inaugurazioa Frontoi Zaharreko ikastetxean. Fermin Calbetonek lehen harria jarri zuen zezen plazaren inguruko lurretan, Armeria Eskola eraikitzea aurreikusi zen lehen kokalekuan. Ondoren, 1913ko ekainaren 16an, Isasi gainean eraikitzea erabaki zen. Zuzendaria: Jose Carnicero Guillemon.
1914
Inaugurazioa
Behin betiko Armeria Eskolaren inaugurazioa.
1914
Erakusketa
Eskualdeko Arte eta Industrien II. erakusketara. Alfontso XIII.ak egindako bisita.
1938
Gerra ondoren
Gerra Zibilaren kalteak konpondu ostean, klaseak berriz abiatu eta lehenengo ikasturtea hasi zen. Zuzendaria: Cándido Astaburuaga Anitua.
1950
Ikasle Ohien elkartea
Ikasle Ohien Elkartea eratu zen, gaur egun Armeria Eskola Elkartea moduan ezagutzen dena. Julio Anitua Alberdi izendatu zuten Batzorde Sortzailearen lehendakari.
1951
Alfontso X.a Jakituna Ordenaren Gorbata
Alfontso X.a Jakituna Ordenaren Gorbata eman zitzaion Armeria Eskolari
1951
Lehen domina nazionala
Armeria Eskolari lehenengo domina eman zitzaion “Arteen eta Laneko Ogibide Artistikoak” eta “Lan Elementalak” eskoletako ikasleek egindako Lanen II. Erakusketa Nazionalean”, Bartzelonan egina.
1954
Ikastetxearen zabalkuntza
Ikastetxearen zabalkuntza lanak hasten dira.
1955
Ohorezko Domina Berezia
Armeria Eskolak Ohorezko Domina Berezia lortu zuen “Lan Eskolek” Valentzian egin zuten III. Erakusketan.
1960
Elektrizitate arloa ezartzen da
Elektrizitateko lehen ikasturtea hasi zen, Julio Busto Chillón irakaslea eta 14 ikaslerekin.
1962
Hastapeneko Lanbide Heziketa ezartzen da
Hastapeneko Lanbide Heziketako lehen promozioa urtarrilean hasi zen.
1963
Elektronika arloa ezarri zen
Estatuan aitzindaria izan zen. Argazkietan eguneko eta gauetako lehen promozioak agertzen dira
1965
Delineazio ikasketak ezarri ziren
(OM de 20/11/1965). Argazkian delineazioko lehen promozioa agertzen da.
1968
Mikromekanika arloa ezarri zen
Estatu mailan aitzindaria. (1968/06/27ko MA, 1968/07/25eko BOE). Horretarako, Ormaechea zuzendaria, Larrañaga zuzendariordea, eta Edmond Coudert Cluseseko irakaslea, Robert Blaise ingeniariarekin harremanetan jarri ziren Besançonen.
1972
Lehen emakumeak
Emakumeak lehen aldiz Armeria Eskolan matrikulatu ziren, Delineazio industrialean.
1979
Moguel-Isasi eraikinaren inaugurazioa
Gaur egun Mogel-Isasi deitzen den eraikina inauguratu zen. Eskolarako 240.000.000 pezetako baliabide didaktikoak hornitzeko lehiaketa publikorako deialdia egin zen.
1981
Teknikerren sorrera
Tekniker gizarteari zerbitzua emateko asmoz sortu zen, enpresen berdintasunezko parte-hartzea ziurtatuz eta ahalbidetuz. Ikasle Ohien Elkarteak gidatuta, Metalurgia Laborategiak Ikerketa Elkarte bihurtu ziren eta Teknikerren egoitza Armeria Eskolan finkatu zen.
1987
Merezimenduengatik Urrezko Domina
Foru Aldundiak merezimenduak aitortzeko saririk handiena, Urrezko Domina, eman zion Armeria Eskolari. Gipuzkoako Ahaldun Nagusiak, Imanol Muruak, udalerriekiko harremanetarako foru diputatuak, Jesús Mª Akizuk, eta tokiko agintariek Ikasle Ohien Elkartearen Urteko Batzarrean irakurri zuten testua.
1996
LOGSEko lehen heziketa zikloa
Lehen aldiz LOGSEko goi mailako heziketa ziklo bat ezarri zen, “Proiektu Mekanikoen Garapena”.
2001
ISO 9000 ziurtagiria
Eusko Jaurlaritzako Hezkuntza, Unibertsitate eta Ikerketa Sailburuaren aitortza, ISO 9000 ziurtagiria lortzeko bidean egindako lanagatik.
2005
Zilarrezko Q ziurtagiria
Armeria Eskolak EFQMren zilarrezko “Q” ziurtagiria lortu zuen.
2012
Ingurumena kudeatzeko sistemaren ziurtagiria
Armeria Eskolak UNE-EN ISO 14001, Ingurumena Kudeatzeko Sistemaren ziurtagiria lortu zuen.
2012
Euskal Makila saria
Armeria Eskolak “Euskal Makila” saria jaso zuen, bere 100 urteko ibilbidea aitortzeko, Empresa Vasca y Sociedad Fundazioak antolatutako “la cita de la Empresa Vasca” ekitaldian.
2012
Lan Onari saria
Jose Luis Novoa Zuzendariak “Lan Onari” saria jaso zuen Armeria Eskolaren izenean Patxi López lehendakariaren eskutik.
2013
Elektronika espezializazioaren ezarpena
Elektronikako espezializazioa ezarri zen (Ekipo elektroniko integratuak garatzeko teknikaria)
2017
Metrologiako espezializazioa ezarri zen
Sariki enpresaren laguntzaz, Kalitate-kontrol metrologikoa izeneko espezializazioa ezarri zen. Argazkian espezializazioan parte hartu zuten enpresen ordezkariak ageri dira.
2018
Metrologiako laborategia
Ethazi gelekin batera, Metrologiako laborategia inauguratu zen.
Ondo Egindako Lana esparru anitzetako profesionalek solasean partekatutako ideiak eta gogoetak jasotzen dituen bilgunea da. Aritu eta aditu horiek izandako bizipenetatik eta egindako lanen oinarrietatik ateratako gogoetak, gakoak eta balioak gizarteratu nahi ditu Armeria Eskolak.
ALEX BENGOA
2021eko abenduaren 14an
Pertsona handia izateagatik, bere ibilbide profesionalagatik eta Teknikerren buru gisa egindako lanagatik, Europako teknologia-zentro ospetsuenetako bat bihurtuz. Lanbide-heziketari eta, bereziki, Armeria Eskolari egindako ekarpenagatik. Hil osteko errekonozimendua 2021eko abenduaren 14an egin zen Armeria Eskolan, senitartekoekin eta lagunekin batera.
UXUE BARKOS BERRUEZO
2020ko urtarrilaren 20an
Kazetari, politikari eta Lehendakari nafarrak izandako ibilbideagatik, politika egiteko beste modu bat erakusteagatik eta bere lana balioetan oinarritzeagatik. Uxue Barkosekin solasean Xabier Lapitz, Informazio Zientzietan lizentziatua, kazetaria eta Uxueren lagun mina izan genuen gure ikastetxean.
FERNANDO SAGASTIGUTXIA
2019ko ekainaren 7an
Maixu handia izateagatik, bizitza osoan erakutsitako balioengatik, ikasleetaz modu berezian arduratzeagatik eta bereziki ibilbide profesionalean erakutsitako profesionaltasunagatik. Hil ondorengo aitortza Maite Sarasketari, Fernandoren alargunari, egin zitzaion ikasturte amaierako saioan Armeria Eskolan.
ELKAR FUNDAZIOA
2019ko otsailaren 11an
Enpresaren izaera eta ereduagatik, ekonomia kulturaren zerbitzura jartzeagatik, euskara eta euskal kultura oinarri hartzeagatik, kudeaketa parekidearengatik eta azken urtetan lortutako garapen eta helburuengatik. Solasean, Elkar-eko Joxe Mari Sors eta Jon Jakarekin batera, Markel Olano, Gipuzkoako Diputatu Nagusia, eta Joan Mari Torrealdai, euskaltzalea, izan genituen, Armeria Eskolan.
EUSKO IKASKUNTZA
2018ko ekainaren 18an
1918an Araba, Bizkaia, Gipuzkoa eta Nafarroako Foru Aldundiak sortutako erakundeak Euskal Herriari egindako ekarpen baliotsua eskertu eta goraipatu nahi izan dugu bere mendeurrenean. Euskal gizartearen egungo eta etorkizuneko erronkak aztertu zituzten Iñaki Dorronsorok, Eusko Ikaskuntzako lehendakariak, Xabier Alkortak, Mendeurrena Batzordeko Lehendakariak eta Pilar Kaltzada kazetariak Armeria Eskolan izandako solasaldian.
MARIANO FERRER
2018ko otsailaren 1ean
Herri Irratiko zuzendari ordea eta kazetariak eta Egin egunkariko lehen zuzendariak bere ibilbidean erakutsitako zintzotasunagatik, zorroztasunagatik eta independentzia politikoagatik. Marianorekin solasean Martxelo Otamendi, Berriako zuzendaria, lankidea eta lagun mina izan genuen, Armeria Eskolan.
JOSÉ LUIS ELKORO
8 de noviembre de 2017
Euskaltzale y político. Por el esfuerzo y el trabajo realizado para euskaldunizar el mundo laboral, especialmente en su empresa Elay. El reconocimiento se le concedió en las jornadas HIZKELAN organizadas conjuntamente entre Laneki y Armeria Eskola.
ABEL BARRIOLA
2017ko irailaren 12an
Txapel gehienak irabazi ez arren, pilotazaleen artean bihotz gehien irabazi dituen pilotaria izateagatik eta ibilbide osoan erakutsi dituen balioengatik. Bere lan eta ibilbidearen inguruko gogoeta eta ametsak partekatzeko, solaskide izan zuen Joseba Urkiola, ETBko kazetaria, herrikidea eta laguna.
JUANJO ALVAREZ RUBIO
2017ko otsailaren 1ean
Nazioarteko Zuzenbideko katedradunak, Bergarako UNEDeko zuzendari akademiko ohiak eta Gobernantza Demokratikoa Institutuko idazkariak Foro nazional zein nazioartekoetan izan duen jarduera zabalagatik eta komunikabide esanguratsuenetan partekatutako hausnarketengatik. Juanjo Alvarez eta Jose Ignacio Ansorena, txistularia, solasean aritu ziren gobernantza onari, humanismoari, zuzenbideari, ingeniaritza sozialari eta etorkizunari buruz.
XABIER AMURIZA
2016ko abenduaren 2an
Euskal kulturaren suspertzaile eta eragile handiak gure Herriari eskaini dion lan, esfortzu eta ekarpenagatik. Bere lan eta ibilbidearen inguruan solasean izan genuen Maialen Lujanbio bertsolariarekin batera etorkizunari buruzko hausnarketa eta kezkak partekatzen.
JAVIER EGURROLA, NATI GARCÍA ETA F. JAVIER PEÑA
2016ko maiatzaren 6an
Hurrenez hurren, Pierburg, Dinitel eta Gaindu enpresetan, izandako ibilbideengatik eta erakutsitako ekintzailetasunagatik. Armeria Eskolan izan genituen beraien bizipenak partekatuz eta bidean ikasitakoaz hitz eginez.
JOAN MARI TORREALDAI
2016ko martxoaren 1ean
Gure Herriari eman eta eskainitako lan eta ekarpen ikaragarriagatik eta euskal kultura suspertzeagatik. Bere lan eta ibilbidearen inguruan eta etorkizunari buruzko hausnarketa eta kezkak partekatzeko, berarekin solasean, Juan Jose Ibarretxe, Lehendakari ohia izan genuen Armeria Eskolan.
ANTONIO CANCELO
2016ko urtarrilaren 25ean
EROSKI taldearen sortzailea eta MCC-ko lehendakari ohiak kooperatiba arloan izandako ibilbideagatik eta erakutsitako ekintzailetasun jarreragatik. Antonio Cancelo enpresaria, Angel Toña Sailburua eta Tomás Arrieta Euskal Lan-harremanetarako Kontseiluko Presidentea solasean aritu ziren enpresa-eredu kolaboratzaileaz eta jasangarriaz.
AITOR GOROSABEL ETA JAGOBA ARRASATE
2015eko urriaren 19an
Musika arloan zein futbol munduan izandako ibilbideengatik eta erakutsitako gizatasunagatik. Biak aurrez-aurre izan genituen berbetan beraien ibilbide profesionaleko oinarri eta gakoei buruz hitz egiten eta gogoeta eraginez Armeria Eskolan.
MANUEL IRAOLAGOITIA ETA MIGUEL LAZPIUR
2015eko maiatzaren 12an
Gizartea aberasten duten enpresa industrialak sortzeagatik eta horiek garatzean erakutsitako gaitasunagatik. Bi enpresariak eta Sabin Azua, B+I ESTRATEGY-ko zuzendaria, elkarrekin solasean aritu ziren izandako esperientziak azalduz eta egungo egoeran gizarte garapenerako industria ehunaren beharra azpimarratuz.
GAIZKA GARITANO AGIRRE
2015eko urtarrilaren 29an
EIBAR Futbol Taldean izandako ibilbideagatik, lortutako emaitzengatik eta, batez ere, gizartean sortutako ilusioagatik. Gaizka Garitano Agirre entrenatzailea eta Joseba Urkiola Irulegi, ETBko kazetaria, elkarrekin solasaldi goxo, dotore eta interesgarrian izan genituen Armeria Eskolan.