Martxoko Nazioarteko Moduluak: Esperientzia Aberats eta Bizigarria

Armeria Eskolako martxoko nazioarteko moduluak amaitu dira, eta pozik esan dezakegu esperientzia aberatsa eta arrakastatsua izan dela bai ikasleentzat bai irakasleentzat. Alemania, Eslovakia, Finlandia eta Herbehereetatik etorritako 15 ikaslerekin batera hiru modulu interesgarri landu genituen: Prozesuen Automatizazioa, Elektrohigadura Fabrikazio-Teknika, eta Elektronika eta Arreta Soziosanitarioa.

Ikasleen iritziz, moduluek gaitasun teknikoak hobetu eta talde-lana sustatu dute. Esperientzia kulturalak eta sozioprofesionalak, hala nola Albaolako bisitak eta Donostiako Kutxa Espazioko tailerrek, ingurunea ezagutzeko eta talde kohesioa indartzeko balio izan dute.

Elektronika eta Arreta Soziosanitarioa: Diziplinarteko Elkarlana

Bigarren urtez antolatutako modulu gurutzatua arrakastatsua izan da aurten ere, diziplinarteko lankidetzari eta Eibarko komunitateari egindako ekarpenari esker. Herbeheretako ikasleekin batera, gure ikasle parte-hartzaileek gailu elektronikoen aplikazio praktikoa landu dute arreta soziosanitarioko testuinguruan. Gainera, Egogain eguneko zentrora egindako bisita berezian, ikasleek bertako egoiliarrekin elkarrizketak izan zituzten, haien behar eta nahiak ulertzeko. Hori oinarri hartuta, Pepper robot humanoidea egokitu zuten egoiliarren aisialdirako eta laguntzarako.

Teknologiaren erabilera berritzaile horri esker, egoiliarrek Errealitate Birtualaren bidez Euskal Herriko haien gustuko tokiak bisitatzeko aukera izan zuten, baita urruneko hiri ezagunak ere. Esperientzia honek, egoiliarrei irribarreak sortzeaz gain, ikasleei teknologia humanizatuaren potentzialaz jabetzeko aukera paregabea eskaini die, ikuspegi profesional eta humano integrala garatuz.

Eskerrik beroenak parte hartu duten ikasleei eta irakasleei, baita etorri diren ikasle eta irakasle atzerritarrei ere. Dagoeneko datorren urteko edizioaren prestakuntzan ari gara lanean!