Armeria Eskolak ikasleen laneratze altua sendotu du

%88k ikasketak amaitu eta urtebetera lan egiten du.

Lanbide Heziketa lan-merkatuan sartzeko bide zuzenenetako bat da oraindik ere, eta Armeria Eskolaren datuek hori islatzen dute berriz ere. Armeria Eskola Elkarteak bildutako datuen arabera, prestakuntza amaitu eta urtebetera ikasleen okupazio-tasa %88koa da, hau da, aurreko promozioarekin alderatuta %5eko igoera.

Azken promozio honetan, erdi-mailako tituludunen %80ak ikasten jarraitzea erabaki du, batez ere goi-mailako heziketa-zikloak egiten.

Goi-mailako zikloak edo espezializazioak amaitzen dituztenen artean, berriz, lan munduan hastea da aukera nagusia: profil horietako okupazio-tasa ere %88koa da.

Laneratze handiaz gain, lortutako enpleguen kalitatea nabarmentzen da. Titulazioa lortu eta urtebetera egindako jarraipenean jasotako datuen arabera, lan egiten duten ikasleen %83ak Armeria Eskolan egindako ikasketekin lotura zuzena duten lanpostuetan egiten dute lan, eta horrek agerian uzten du prestakuntza eta inguruko enpresen beharrak bat datozela.

Eskualdeko enpresa-sarearekiko lankidetza funtsezkoa da berriz ere: Ikasle enplegatuen %41ek praktikak edo duala egin zituen enpresa berean jarraitzen du lanean. Zifra hori aurreko urteetakoa baino zertxobait txikiagoa bada ere, eredu dualak enplegua zuzenean eskuratzeko bide gisa eta produkzio-inguruneetan ikasteko espazio erreal gisa duen garrantzia berresten du.